Dómsmálaráðuneytið
Yfirlit
Dómsmálaráðuneytið kemur að framkvæmd kosninga með margvíslegum hætti. Það annast m.a. gerð og dreifingu kjörgagna bæði utan kjörfundar og á kjörfundi.
Kjörstjórnir
Ákveða þóknun
Dómsmálaráðherra ákveður þóknun fyrir störf landskjörstjórnar og yfirkjörstjórna.
Gerðabækur og innsigli
Dómsmálaráðuneytið lætur í té og löggildir gerðabækur landskjörstjórnar og yfirkjörstjórnar. Einnig lætur ráðuneytið kjörstjórnum í té embættisinnsigli.
Kjördagur
Auglýsing þjóðaratkvæðagreiðslu
Dómsmálaráðuneytinu ber að taka ákvörðun um dagsetningu atkvæðagreiðslunnar að höfðu samráði við landskjörstjórn. Auglýsir dómsmálaráðuneytið að því búnu hvenær þjóðaratkvæðagreiðslan fer fram eigi síðar en þremur vikum fyrir atkvæðagreiðsluna.
Kjörskrár
Auglýsing um framlagningu kjörskráa
Dómsmálaráðuneytinu ber að auglýsa framlagningu kjörskráa í fjölmiðlum í síðasta lagi 12 dögum fyrir kjördag. Þar á að koma fram að athugasemdir við kjörskrá skuli senda til hlutaðeigandi sveitarstjórna.
Kjörgögn
Kjörgögn fyrir utankjörfundaratkvæðagreiðslu
Dómsmálaráðuneytið lætur í té kjörgögn fyrir utankjörfundaratkvæðagreiðslu og leiðbeiningar um tilhögun atkvæðagreiðslunnar. Kjörgögn þessi skulu vera fyrir hendi hjá þeim sem annast atkvæðagreiðslu utan kjörfundar, þ.e. hjá sýslumönnum og skipstjórum en utanríkisráðuneytið sér um að koma þessum kjörgögnum til kjörstjóra erlendis.
Kjörgögn sem notuð eru við utankjörfundaratkvæðagreiðslu eru: kjörseðill, kjörseðilsumslag, fylgibréf og sendiumslag.
Kjörgögn fyrir kjörfund á kjördag
Dómsmálaráðuneytið lætur gera kjörseðla sem notaðir verða við þjóðaratkvæðagreiðsluna. Þá auglýsir það eigi síðar en einni viku spurninguna sem borin verður upp í þjóðaratkvæðagreiðslunni. Kjörseðlar skulu vera á haldgóðum pappír sem prent eða skrift sést ekki í gegnum, a.m.k. 125 g/m2 að þyngd. Skipta skal um lit kjörseðla við hverjar alþingiskosningar.
Kjörseðlar sem notaðir verða á kjörfundi skal fullgera þannig að spurt verði á skýran hátt hvort lög nr. 1/2010 eigi að halda gildi sínu eða þau eigi að falla úr gildi. Kjörseðlana skal brjóta saman þannig að óprentaða hliðin snúi út. Ekki skal fullgera fleiri seðla en þá sem sendir verða undirkjörstjórnum og skal yfirkjörstjórn varast að láta óviðkomandi sjá seðlana áður en hún sendir þá frá sér.
Kjörseðlar skulu að jafnaði fullgerðir eigi síðar en sjö dögum fyrir kjördag og skal dómsmálaráðuneytið þá senda þá til yfirkjörstjórna.
Stærð og gerð atkvæðakassa
Dómsmálaráðherra setur nánari reglur um stærð og gerð atkvæðakassa en í kjörfundarstofu skal vera hæfilega stór atkvæðakassi sem sveitarstjórn leggur til. Atkvæðakassinn skal þannig búinn að ekki sé unnt að ná kjörseðli úr honum án þess að opna hann og þannig að unnt sé að læsa honum.
Atkvæðagreiðsla á kjörfundi
Kosningaleiðbeiningar ásamt sérútgáfu af lögum um kosningar til Alþingis
Dómsmálaráðuneytið lætur kjörstjórnum í té kosningaleiðbeiningar sem hægt er að festa upp í kjörfundarstofu. Þá skal í hverri kjördeild vera til staðar sérprentun sem dómsmálaráðuneytið gefur út með lögum um kosningar til Alþingis, ásamt stjórnarskránni ásamt skýringum ef þurfa þykir.
Kosningaúrslit og talning
Kjörgögn lögð fyrir landskjörstjórn
Að talningu lokinni sendir yfirkjörstjórn landskjörstjórn afrit af gerðabók sinni viðvíkjandi kosningunni ásamt ágreiningsseðlum. Kemur landskjörstjórn saman til að úrskurða um gildi ágreiningsseðla og lýsa úrslitum þjóðaratkvæðagreiðslunnar. Tilkynnir hún síðan dómsmálaráðuneytinu um niðurstöður sínar.
Geymsla kjörskrár
Eftir að yfirkjörstjórn hefur gengið frá öllum kjörskrám í innsiglaðar umbúðir sendir hún dómsmálaráðuneytinu þær, en ráðuneytið geymir þær í eitt ár.
Auglýsingar
Dómsmálaráðuneytið auglýsir úrslit atkvæðagreiðslunnar í Lögbirtingablaði og Ríkisútvarpi. Verði lög nr. 1/2010 felld úr gildi í þjóðaratkvæðagreiðslunni skal ráðuneytið auk þess birta sérstaka auglýsingu þess efnis í A-deild Stjórnartíðinda um leið og úrslit atkvæðagreiðslunnar liggja fyrir.