Atkvæðagreiðsla á kjördag 6. mars 2010

Kjörstaðir

Sveitarstjórn skal auglýsa kjörstað með nægilegum fyrirvara á þann hátt sem venja er að birta opinberar auglýsingar.

Upphaf og lok kjörfundar

Upphaf: Kjörstaðir skulu opnaðir á bilinu 9-12 árdegis og skal sveitarstjórn eða yfirkjörstjórn auglýsa nákvæma tímasetningu með hæfilegum fyrirvara.

Lok: Meginreglan er að atkvæðagreiðslu megi ekki slíta fyrr en átta klukkustundir eru liðnar frá því að kjörfundur hófst og ekki fyrr en hálf klukkustund er liðin frá því að kjósandi gaf sig síðast fram. Frá þessari meginreglu er þó sú undantekning að atkvæðagreiðslu megi slíta ef allir sem eru á kjörskrá hafa greitt atkvæði og eftir fimm klukkustundir ef öll kjörstjórnin og umboðsmenn eru sammála um það, enda sé hálf klukkustund liðin frá því að kjósandi gaf sig síðast fram. Kjörfundi skal þó slitið eigi síðar en kl. 22 á kjördag.

Hvernig fer kosning fram á kjörfundi?

Kjörfundarstofan
Kjósendur skulu greiða atkvæði í þeirri röð sem þeir gefa sig fram. Þá getur kjörstjórn ákveðið að í kjörfundarstofu séu ekki, auk þeirra sem starfa við framkvæmd kosninganna, aðrir en kjósendur sem ætla að greiða atkvæði.

Kjósandi gerir grein fyrir sér
Kjósandi skal gera grein fyrir sér með því að framvísa kennivottorði eða nafnskírteini, eða á annan fullnægjandi hátt að mati kjörstjórnar. Kennivottorð er persónuskilríki með mynd, svo sem vegabréf, ökuskírteini, bankakort eða greiðslukort. Ef hann á rétt á að greiða atkvæði fær hann afhentan einn kjörseðil.

Kjörklefinn og meðferð kjörseðils
Þegar kjósandi hefur tekið við kjörseðlinum fer hann inn í kjörklefann. Í kjörklefanum skal vera borð og á því skulu vera ekki færri en tveir vel yddaðir blýantar. Kjósandinn merkir við á kjörseðli hvort hann samþykki að lög nr. 1/2010 haldi gildi sínu eða að þau eigi að falla úr gildi.

Í kjörklefanum skal einnig vera spjald jafnstórt kjörseðli með blindraletri, með glugga framan við sitt hvorn valkostinn og vasa á bakhlið þannig að blindir geti gegnum gluggann sett merki framan við þann svarmöguleika sem þeir vilja gefa atkvæði sitt og á þann hátt kosið í einrúmi og án aðstoðar.

Kjósandi verður að gæta þess, hvernig sem hann kýs, að gera engin merki á kjörseðilinn fram yfir það sem hér segir, slíkt gæti valdið ógildingu atkvæðisins.

Kjörkassi
Þegar kjósandi hefur gengið frá kjörseðlinum samkvæmt framansögðu brýtur hann seðilinn í sama brot og hann var í þegar hann tók við honum, svo að letrið snúi inn, gengur út úr klefanum og að atkvæðakassanum og leggur seðilinn í kassann í viðurvist fulltrúa kjörstjórnar. Kjósandi skal gæta þess að enginn geti séð hvernig hann greiddi atkvæði. Þá víkur hann af kjörfundarstofunni þegar að hann hefur látið kjörseðilinn í kjörkassann.

Kjósandi þarf aðstoð

Ef kjósandi skýrir kjörstjórn svo frá að hann sé eigi fær um að kjósa á fyrirskipaðan hátt sakir sjónleysis eða annarar fötlunar skal sá úr kjörstjórninni er kjósandi nefnir veita honum aðstoð til þess í kjörklefanum, enda er sá sem aðstoðina veitir bundinn þagnarheiti um að segja ekki frá því sem þeim fer þar á milli. Aðstoð skal þó aðeins veita að kjósandi geti sjálfur skýrt þeim er aðstoðina veitir ótvírætt frá því hvernig hann vill greiða atkvæði sitt. Kjósandi verður sjálfur að biðja um aðstoð.

Réttur til að fá nýjan kjörseðil

Láti kjósandi sjá hvernig hann hefur greitt atkvæði sitt er seðillinn ónýtur og má ekki leggja hann í atkvæðakassann. Ef kjósanda verður þetta á eða ef hann setur skakkt kjörmerki á seðil eða seðill krotast hjá honum af vangá á hann rétt á að fá nýjan kjörseðil. Skal hann þá afhenda kjörstjórninni hinn fyrri seðil.