Kjörskrá
Efnisyfirlit
Gerð kjörskrár
Sveitarstjórnir sjá um að kjörskrár séu gerðar og skal samningu þeirra lokið í tæka tíð fyrir framlagningu. Vakin er athygli á að kjörskrár skulu lagðar fram almenningi til sýnis í síðasta lagi 19. maí 2010.
Hvar ertu á kjörskrá?
Kjörskrá - almennar upplýsingar
Á kjörskrá eru teknir þeir íbúar sveitarfélagsins sem uppfylla öll kosningarréttarskilyrði á viðmiðunardegi kjörskrár (8. maí 2010), að viðbættum nöfnum þeirra sem dveljast á hinum Norðurlöndunum og eiga að hafa hér kosningarrétt.
Nánar tiltekið eru það þeir eftirfarandi sem uppfylla eftirfarandi þrjú skilyrði:
- Eru 18 ára þegar kosning fer fram.
- Eru íslenskir ríkisborgarar.
- Voru skráðir með lögheimili í sveitarfélaginu samkvæmt íbúaskrá þjóðskrár þremur vikum fyrir kjördag, þ.e. 8. maí.
Þeir sem tilkynnt hafa flutning samkvæmt Norðurlandasamningi um almannaskráningu, enda eigi ákvæði 9. gr. laga um lögheimili, nr. 21/1990, við um hagi þeirra, og þeir fullnægi að öðru leyti fyrrgreindum kosningarréttarskilyrðum. Ákvæði þetta nýtist fyrst og fremst námsmönnum á Norðurlöndunum.
Danskir, finnskir, norskir og sænskir ríkisborgarar sem uppfylla skilyrði 1. og 3. liða hér að framan (aldur og lögheimili), enda hafi þeir átt lögheimili hér á landi í þrjú ár samfellt fyrir kjördag, og aðrir erlendir ríkisborgarar sem átt hafa lögheimili hér á landi í fimm ár samfellt fyrir kjördag.
Hverja skal ekki taka á kjörskrá
Við ákvörðun á því í hvaða sveitarfélagi einstaklingur eigi kosningarrétt er miðað við skráð lögheimili samkvæmt íbúaskrá þjóðskrár þremur vikum fyrir kjördag. Ekki er lengur um að ræða huglægt mat um búsetu heldur hina opinberu skráningu í þjóðskrá. Þannig er til dæmis ekki heimilt að taka einstakling inn á kjörskrá sem gleymt hefur að flytja lögheimili sitt til þess sveitarfélags í tæka tíð fyrir viðmiðunardag kjörskrár (8. maí 2010).
Afleiðingar þess að einstaklingar eru ranglega á kjörskrá
Slíkt getur leitt til ógildingar kosninga ef niðurstöður þeirra velta á örfáum atkvæðum. Þetta á við þegar munar jafnmörgum eða færri atkvæðum og fjöldi þeirra er ranglega voru teknir inn á kjörskrá. Atkvæði þeirra einstaklinga gætu því hafa haft áhrif á niðurstöðu kosninganna.
Framlagning kjörskrár
Sveitarstjórn auglýsir framlagningarstað kjörskrár áður en kjörskrá er lögð fram. Skal það gert á þann hátt á hverjum stað sem venja er þar að birta opinberar auglýsingar. Algengast er að kjörskrár liggi frammi á skrifstofum sveitarfélaganna. Kjörskrá skal liggja frammi fyrir almenning í a.m.k. 10 daga fyrir kjördag. Sú kjörskrá má vera heildarkjörskrá fyrir sveitarfélagið, þ.e. þarf ekki að vera skipt í kjördeildir.
Athugasemdir við kjörskrá
Hver sem er getur gert athugasemdir til sveitarstjórnar um að nafn eða nöfn einhverra kjósenda vanti á kjörskrá eða þeim sé þar ofaukið. Heimilt er að gera slíkar athugasemdir til sveitarstjórnar fram á kjördag.
Afgreiðsla athugasemda: Sveitarstjórn skal þegar taka til meðferðar athugasemdir er henni berast vegna kjörskrár og gera viðeigandi leiðréttingar á henni. Slíkar leiðréttingar má gera fram á kjördag.
Tilkynningar um leiðréttingar: Sveitarstjórn skal þegar tilkynna hlutaðeigandi einstaklingum um leiðréttingar á kjörskrá, svo og þeirri sveitarstjórn er málið getur varðað.