Athugið: Þessar síður fjalla um þjóðaratkvæðagreiðslur.
        Smellið hér til að skoða upplýsingar í tengslum við alþingiskosningar 29. október 2016


Þjóðaratkvæðagreiðsla 9. apríl 2011

Táknmál

Þjóðaratkvæðagreiðsla fer fram hinn 9. apríl 2011 um gildi laga nr. 13/2011 sem samþykkt voru á Alþingi hinn 16. febrúar 2011

Þjóðaratkvæðagreiðsla fer fram hinn 9. apríl 2011 um gildi laga nr. 13/2011 sem samþykkt voru á Alþingi hinn 16. febrúar 2011 en forseti Íslands synjaði staðfestingar. Lögum samkvæmt skal því leggja lögin undir atkvæði allra kosningarbærra manna í landinu til samþykktar eða synjunar með leynilegri atkvæðagreiðslu.

Í atkvæðagreiðslunni verður spurt um eftirfarandi:

Lög nr. 13/2011 kveða á um heimild til handa fjármálaráðherra til að staðfesta samninga, sem áritaðir voru í London 8. desember 2010, um ábyrgð á endurgreiðslu Tryggingarsjóðs innstæðueigenda og fjárfesta til breska og hollenska ríkisins á kostnaði af greiðslu lágmarkstryggingar til innstæðueigenda í útibúum Landsbanka Íslands hf. í Bretlandi og Hollandi og greiðslu eftirstöðva og vaxta af þeim skuldbindingum.

Lögin voru samþykkt á Alþingi hinn 16. febrúar 2011 en forseti Íslands synjaði þeim staðfestingar.

Eiga lög nr. 13/2011 að halda gildi?

Svarkostirnir eru:

Já, þau eiga að halda gildi.

Nei, þau eiga að falla úr gildi.

Atkvæðagreiðslan fer fram á sömu kjörstöðum og notast er við í almennum kosningum. Einstök sveitarfélög auglýsa nánar um kjörstaðina skömmu fyrir atkvæðagreiðsluna, m.a. hvenær þeir eru opnir, hvar þeir eru, hvernig skipt er í kjördeildir, o.fl.  Kjósendur eru beðnir að kynna sér vel þær upplýsingar. Kosningarrétt eiga þeir kjósendur sem eiga kosningarrétt til Alþingis.

Kjörskrár verða gerðar á grundvelli kjörskrárstofna sem Þjóðskrá Íslands lætur sveitarstjórnum í té. Kjörskrár miðast við skráð lögheimili í viðkomandi sveitarfélagi hinn 19. mars 2011. Skulu kjörskrár lagðar fram hjá sveitarstjórnum almenningi til sýnis eigi síðar en 30. mars nk. á þann hátt sem venja er á hverjum stað. .

Atkvæðagreiðsla utan kjörfundar hefst 16. mars 2011.

Á vefsíðu Alþingis, althingi.is, undir dálkinum Efni um Icesave, er að finna frumvarpið sem varð að lögum nr. 13/2011, ásamt öllum skjölum er varða meðferð þess á þinginu.

Nánari upplýsingar um framkvæmd þjóðaratkvæðagreiðslunnar eru á kosningavef innanríkisráðuneytisins, www.kosning.is.